گول آذربایجان

سئوگی دونیام منیم! توپراغیم منیم،
اوجالار اوجاسی گول آذربایجان!…
بئشیگیم، اشیگیم، اوجاغیم منیم،
آنالار آناسی گول آذربایجان!…

ازلدن یانیبسان، یئنه یانارسان،
گؤزللر اؤلکه سی گؤزل دیارسان،
قانلی کفنلردیر کؤکسونو یارسان،
شهیدلر دونیاسی گول آذربایجان!…

اؤزلمینده “هارای” یاندی دویسانا!
دردیمی، سؤزومو آی گؤزل آنا،
دینله سن منی، من سؤیله ییم سانا،
گؤنلومون یاراسی گول آذربایجان