صفاسی وار + علی آقا واحید

گرچه محبت عالمینین چوْخ صفاسی وار
هر قاره زولفه میل ائده نین مین بلاسی وار
عاشق شكایت ائیله مز هر جوره صبر ائدر
پروانه سانما آتشه یانسا نواسی وار
هر آشیانه سؤیلمه ك اؤلماز وفاسی یوخ
چك امتحانه بلكه بیر اهل وفاسی وار
قویما قدم دیار محبت بلالی دیر
نه ابتداسی وار نه ده كی انتهاسی وار
صبریله گون گئچیدیر اهل عشق اوْلان
هر درد اوْلورسا آخری بیر گون دواسی وار
بیر داش اوره كلی دلبره چوْخدان وورولموشام
نه رحمی وار نه دوْستلوقی وار نه اداسی وار
شاعرلر ایچره سانما هنرسیزدی واحدی
واحد نه اوْلسادا یئنه بیر ادعاسی وار