سوسوز دنیز

گؤرمه میشدیک بو گونه جن

بیر دنیزین بوغولماغینی

زنجیرله ییب قانادلاییب آل قانینی یایماغینی

قوینونداکی دورنالارین ایتگین دوشن سورگونلرین

دوزلو بورانلیقلارین داغ دره یه یایماغینی

بیر دنیزین بوغماغینی! 

سینه سیندن یول دوشر کن دوشگون اولود جوشار دنیز

سدلر ووروب جان آلدیلار دادلی دوزلو دنیزیمدن

ائله بیل کی قان آلدیلار او آل یاناق بنیزیمدن

اینصافسیزجا باییرلادی غم کدردن ساچ آغاردی

دنیز کؤکوندن لاخلادی

سوسوزلوقدان دوزلاقلادی

قهر ائدر کن دوزلو بوران یاتدی باغا

سولدو گوللر باغدان باغا

دوز الندی یارپاقلارا 

بوغدالار دا گؤیره مه دی

قهرلنیب جوجرمه دی

تام اکینلر بئجرمه دی

آمما آذربایجان دنیزینده قئیرت واردیر سانا گلمز

ائللری تک هئچ تؤکنمز

غم،کدری چکه-چکه، چاناقجادا سویو اولسا

زنجیرلنمیش بوغازیندان باغیراجاق دؤنه-دؤنه

آخار چایلار دؤنسون سئله

قودرت وئرسین اونا بئله

دالغالانسین گوله-گوله

یئنه گئجه آی باغریندا دالغالانیب یئرییه جک

سویو کسن میرآب گؤروب چورویه  

چورویه جک!

رقیه علی قلیان (لاله)