سارای ( آنا یوردون قیزی )

سارا بیر آیدی بیزیم ائللره آیسیز گجه لر

بیر اوجا سسدی قولاق وئر اونا هایسیز گجه لر

سارا بیر قیزدی سودان سورمه چكیب گوزلرینه

جان دییب بیرده اوركدن آرازین سوزلرینه

اوزونی آتدی سئله اوزگنی حیران ائلدی

او یانان شمعینی پروانیه قوربان ائله دی

قوشولوب سئللره گئتدی آنا یوردون ساراسی

قالدی شیرین اورگینده یئنه فرهاد یاراسی

باغلادی ساچلارینی قویمادی بیگانه گوره

آنا یوردون قیزی وئرمز ساچین هر كیمسه هوره

گئتدی گوزلردن اوزاق دوشدی ائلین بیردنه سی

گورمه دی خان چوبانین آیریلیقین سون نفسی