تیکانلی  تئللر

آه  بوتیکانلی  تئللر...!

باخارسام

     گؤزومده

دینرسم

     سؤزومده

خیالیم دا  سنه دوغرو اوچاندا

       تیکانلی تئللره تاخیلیب قالیر

دویغولاریم  منی  چاغیراندا دا

باخمامیش بیلیرم

         قاپینی  سارمیش

                   تیکانلی  تئللر

او اوزدن گؤزلیم

سنی گؤرمک دئییل

اوزاقدان دا  اولسا

بیر ساده سالام...

اودا  قالسین هله

بیر سس سیز گؤروشون بئله

                              آرزی- خیالی

بئینيمده  دوغمامیش

تیکانلارین جایناغیندا گوللنیر

دئ!

ندن دولماسین شعردفتریم

تیکانلی تئللرین ایزلری ایله؟

او منیم  بویوران

      منیم  آمیریم

قوی قورتاریم  سنی منیم قلمیم.

دفتریمسه

قلبیم

  دویغوم

     آرزيم

        خیالیم.

باشاریب دئدیگیم بوقدرجیگین

اؤیرنندن سونرا دئسه نه گولوم

            جانیم

               سئوگیلیم!

یئنه ده  مندن گیلئیلی ميسن؟

آه او گون...

شانيم

شرفيم

غئيرتيم

غوروروم دوستاقدا

ها دارتينير

ها دارتينير

دار قفسين سينديرانمير

قالخير دوشور

قالخير دوشور

بو گؤرونتو كور اينساني قانديرانمير

ايزله يير بيري

الي باغلي قولو باغلي ديلي باغلي

سئير ائدير بيري

ال-آياغي چكمه لري ديزه قدر قيزيل قانلي

قلبي باغلي

غوروروم منليگيم دئييل

غورور منيم بوتونومدور

غوروروم اولمايان يئرده من ده يوخام

بير گون واراق دؤنريسه

من قلبيمي قيفيللاييب

آچاريني

تاريخيمين ويلدن درين قويوسونا آتاجاغام

اينسانيت درسي وئرن كيتابلارين

بيرر بيرر واراقلارين

كينه دولو نيفرت دولو

ان موقددس شعيرلرله دييشديريب

گونش توتان هر بير يئره آساجاغام

يات  هله

آیسیز گئجه لر اوزونو

یاغماچیلار  یوروشوندن

ان  موقددس وارلیغیمیز

بوغدا  کیمی تالالاردان توپارلانیب

تاریخین  گئن خرمنینده

خینجیر خینجیر ازیلدی

سامان اولوب ساورولدو

یئتیم قالمیش آرزیلار

دارماداغین داغیلیب

کول کوسلارین اوزرینه

آغیرلیقدان یئرده قالان

برکنلی دردلریمیز

ائشیتسه یدین سسیمی بیر

سنه اویان دییه جکدیم

نه یازیق كي اسير"من" ین پلتک دیلی

بولوشمادی سنین قیفیل قولاغینلا

گیزله ديلمیش آچالارین آدرئسیني وئره چکدیم:

"دئوین جانی جام  ایچینده اولان کیمی

بیزیم قیفیللاریمیزین آچاری دا

اوخونمامیش کیتابلارین

واراق- واراق

سطیر- سطیر

سؤزلرینین ایچینده دیر" دییه جکدیم

نه یازیق کی ائشیتمیرسن

نه یازیق کی  یئترینجه سسیم چیخمیر...

یات  گؤزلیم

آمما بیرآن  اویانیب دا

دوه کوچموش یورد آغلاییر گؤرریسن

آچیق دئییم تام اولاراق اؤزونو یوخ گؤرریسن

هئچ  شاشیرما

کیمسه نی ده قیناما  دای

گيزلي مكتوب

سلام...

سنه سلام وئرمك بئله

                 نيسگيل اولوب

بو گون سنه نه دئمه لي؟

تبريك دئييم؟

يا تسليت؟

شن گونونده

          ديله كلرين

               ديره كلرين باشين اؤپدو

ظاليملرين ميندار الي

                   آرزيلاري

                        كول ائله ييب يئره سپدي

ايللر بويو حسرت – حسرت

اؤكسوز، باشسيز بير اوشاق تك

يئتيم قالميش بير اوشاق تك

گئندن گئنه

      خياليمدا سوزوب سني ،

دردلريمي

     كلمه – كلمه

              گؤزلريمه آخيتميشام