عاشیق اورک

ساده دئییم ای اوره ییم یار سنی دای سئومه ییری

کونلونده کی او سئوگینین دیرینی بیلمه ییری

دونیا قدر سنی سئون سنله دئییب سنله گولن

آیریلیق دان یانان قلبه نه دن درمان گلمه ییری

زامان دورور نفس گلمیر ، اونو گؤرن زامان آما

گؤزلرینی آچ اوره ییم او هئچ سنی گؤرمه ییری

هر گون هر آن سؤیله ییرسن سنی گولوم چوخ سئویرم

آما اونا سوراندا کی سئویرسن سن ؟ دینمه ییری

سنی قویوب گئدن زامان دئدین اونا گئتمه دایان

بسدی داحا قبول ائله یارین سنه دؤنمه ییری

دئدیم سنه نصیحتی ، آما هاردا قولاق آسان

من تانیان عاشیق اورک آیریلماغا دؤزمه ییری

شاعیر : وحید شکرزاده

Aşiq ürək

Sadə deyim ey ürəyim yar səni day sevməyiri

Könlündəki o sevginin dəyərini bilməyiri

Dunya qədər səni sevən sənlə deyib sənlə gülən

Ayrılıqdan yanan qəlbə nədən dərman gəlməyiri

Zaman durur nəfəs gəlmir onu görən zaman ama

Gözlərini aç ürəyim o heç səni görməyiri

Hər gün hər an söyləyirsən səni gülüm çox sevirəm

Ama ona sorandaki sevirsən sən ? dinməyiri

Səni qoyub gedən zaman dedin ona getmə dayan

Bəsdi daha qəbul elə yarın sənə dönməyiri

Dedim sənə nəsihəti ama harda qulaq asan

Mən tanıyan aşiq ürək ayrılmağa dözməyiri

Şair : Vəhid Şükürzadə