گئتدی گؤردوم

الیمدن هرنه واریم گئتدی گوردوم

یانیمدان نازلی یاریم گئتدی گوردوم

غمیندن قاره گیمیشدی زمانه

قان آغلیردی دیاریم گئتدی گوردوم

یوموبدی گوزلرین اصلا اویانمیر

بو گوزلر گوزلریندن هیچ دویانمیر

ندن منسیز گئدیر بیر آن دایانمیر

داها صبریم قراریم گئتدی گوردوم

غمیندن باغچالاردا سولدو گوللر

سارالدی گورنه پرپر اولدی گوللر

گلیب افغانه زولفون یولدو گوللر

خزان اولدو بهاریم گئتدی گوردوم

او گئتدی گویده سوسدو یئرده سوسدو

قلم قان آغلادی دفترده سوسدو

اورکده دوزمدی بو درده سوسدو

الیمدن ایختیاریم گئتدی گوردوم

بساطین قورسادا فصل زمستان

گلنده هریئر اولموشدو گولستان

گئدنده سوسدو جومله باغ و بستان

چوخالدی آه و زاریم گئتدی گوردوم

سوروردوک عمری بیز شاد و خرامان

بیزی شن گورمگه قیسقاندی دوران

قارا یئل اسدی ویران اولدی هریان

منیم دارو نداریم گئتدی گوردوم

شاعیر : قادیر بابائی