ایلهام گلر ، اورک دولار

آنا دیلی شیرین اولار

شاعیر یازار اؤز دیلینده

آلقیشلانار اؤز ائلینده

مین ایل کئچسه یاددان چیخماز

اونون شعری کهنه اولماز

آما گلیب ائله زامان

دئیبلر کی آمان آمان

شاعیر گرک فارسی یازسین !

اؤز دیلینین قبرین قازسین !

اؤزگه ائلدن آلقیش آلسین !

اؤز دیلینی دالی سالسین !

آخی او دیل اوستون دیلدیر !

شعرینده ده بونو بیلدیر

بو سؤزلره اینانان وار

اؤزگه دیلده شعر یازان وار

شعرلرینی فارسی یازیر

اؤزگه اوچون یولون آزیر

اؤز دیلینده بیر شعر یازمیر

مگر آنا دیلین قانمیر ؟

اؤزگه دیلده مین شعر یازیب

اؤز دیلینی باشدان آتیب

بئله شاعیر اولماز اولسون

شعر ایلهامی گؤروم سولسون

من دئمیرم تک تورکجه یاز

فارسی شعرلرین اولسون آز

اون شعر اؤز دیلینده یازسان

عیبی یوخ بیر دفه آزسان

آما تک فارسی یازیرسان

هر زامان بیل کی آزیرسان

شعرلری چاپ اولماق اوچون

ایکی آلقیش آلماق اوچون

آنا دیلین ساتماق اولار ؟

اؤز میللتین آتماق اولار ؟

سنی سئودی فارس میللتی

یاشاگینان بو ذیللتی

اؤز ائلیندن سئونین یوخ

داشین سندن ارزیشی چوخ

قوی کی سنی سئوسین ایران

منه یئتر آذربایجان