آنا دیلیم

کیملیگیم سن آدیمسان
وارلیغیم هر زادیمسان
سویوموزدان یئتیشن
غئیرتیم حیاتیمسان
کیتابیمدیر بو دیلیم
بو کیتابدان نه بیلیم
گئچمیشیمین ایزلرینی
آختاریریق ایلیم ـ ایلیم
دئییب گولمک ساتیری
قندی گوله قاتیری
سازین سؤزو صؤحبتی
اوره‌کلره یاتیری
روحوم جانیم دیله‌ییم
گؤز بَبَگیم اوره‌ییم
جنّتیم دیر آنا دیل
سئویرم دا نئیله‌ییم
شنلیگ اولسون قالالار
شیرین شکر بالالار
بولبول‌ده اؤز دیلینده
آنا دیلدن ذؤوق آلار
شاعیریمین سئودیی
قیزیل گولون خوش اییی
سئوگیلیمین سؤز ـ سویو
تانریمیزین وئردییی
تالاندین تاپدالاندین
کین اودلاریندا یاندین
داندیلاردا خایین‌لر
ظؤلمه‌ دؤزوب دایاندین
بولودلارگؤیه دولدو
گونشین ساچین یولدو
سنین‌له دویغولاریم
هؤرولدو دؤردولوک اولدور
قهرمانیم ایگیدلیک‌له
آرخا دوردو آنا دیله
تبریز اوغلون قوجاقلادی
گؤزو دولدو گوله ـ گوله
یاشاسین بو اینسانی
سئویندیردی آنانی
توپراق سایی یاشاسین
ائل دردینه یانانی
تبریزین دام ـ داشینا
گول سیه‌لنسین باشینا
ائشیدیب گؤردویونو
یازدی تاریخ یادداشینا

م . زمانی